Բնակարանի բանալիի փոխանցում նոր տանտիրոջը վաճառքից հետ

Ի՞նչ քայլեր են սպասվում տուն վաճառելիս

Որոշե՞լ եք վաճառել Ձեր բնակարանը, ուրեմն այս հոդվածը Ձեզ համար է: Այստեղ կներկայացնենք Ձեզ սպասվող քայլերը և կտրամադրենք խորհուրդներ, որոնք զգալի կխնայեն Ձեր ժամանակը և կօգնեն խուսափել սխալներից և անցանկալի ելքերից:

Դե ինչ, դուք միակը չեք, և յուրաքանչյուր վաճառող ցանկանում է հնարավորինս շուտ վաճառել իր գույքը և դրա դիմաց ստանալ ցանկալի գումար: Որպեսզի շուկայում առկա վաճառվող տների հսկայական քանակության մեջ հենց Ձեր բնակարանը վաճառվի, պետք է նախապատրաստվել և յուրաքանչյուր քայլին գործել մտածված:

Ստորև ներկայացնում ենք սպասվող քայլերը և խորհուրդներ, որոնց հետևելով զգալի կմեծացնեք ցանկալի արդյունքին հասնելու Ձեր հավանականությունը:


1. Փաստաթղթերի նախապատրաստում

Անհրաժեշտ է հավաքել բոլոր պահանջվող փաստաթղթերը հենց սկզբից, որպեսզի հետագա քայլերը չլինեն առոչինչ։ Եթե օրինակ ընթացքում պարզվի, որ փաստաթղթերից որոշները ինչ-ինչ պատճառներով անհնար է ձեռք բերել:

Անհրաժեշտ է.

  1. Տան սեփականատիրոջ անձնագիրը (կամ բոլոր սեփականատերերի, եթե բնակարանը ունի մեկից ավելի սեփականատեր):
  2. Բնակարանների սեփականության իրավունքի առաջացման հիմքը հաստատող փաստաթուղթը: Դրանք են՝ կտակ, ժառանգության իրավունքի վկայագիր, բնակարանների մասնավորեցման պայմանագիր, նվիրատվություն, փոխանակում, առք ու վաճառքի պայմանագիր:
  3. Սեփականության վկայական:
  4. Վկայագիր հարկայինի գրասենյակից, որը հաստատում է գույքահարկի պարտքի բացակայությունը:
  5. Տեղեկանքներ բնակարանային և կոմունալ ծառայությունների կողմից, որը կհաստատի տվյալ ծառայությունների (էլեկտրականություն, գազ, ջուր, հեռախոս, վարձավճար) դիմաց պարտքի բացակայությունը:
  6. Նոտարի կողմից վավերացված ամուսնու կամ կնոջ համաձայնությունը գործարքին: Դա անհրաժեշտ է, եթե բնակարանը գնվել է ամուսնության ընթացքում: Նույնիսկ եթե ամուսնալուծված եք, դա Ձեզ պետք կգա: Այն չի պահանջվում, եթե բնակարանը ստացվել է որպես նվեր, փոխանցվել է կտակով կամ ժառանգությամբ, ինչպես նաև ամուսնության պայմանագիր կնքելու դեպքում:
  7. Խնամակալների և խնամակալ մարմինների համաձայնությունը գործարքին: Պահանջվում է, երբ տան սեփականատերը կամ սեփականատերերից մեկը անչափահաս է։
  8. Վաճառքը իրականացնելուց առաջ անհրաժեշտ է լինելու կադաստրի պետական կոմիտեից վերցնել միասնական տեղեկանք, որը պետք է հաստատի, որ տվյալ գույքը գրավադրված չէ և չկա որևէ արգելանք վաճառքն իրականացնելու համար: Տվյալ տեղեկանքն արժե 10000 դրամ, սակայն ունի ժամկետ, ուստի եթե դուք վստահ եք որ չկան որևէ արգելանքներ, կարող եք միասնական տեղեկանքը վերցնել վաճառքից առաջ: Հակառակ դեպքում արժե նախապես վերցնել տվյալ տեղեկանքը, որպեսզի վերջում չպարզվի, որ կատարած բոլոր քայլերը ապարդյուն էին:
  9. Բացառիկ դեպքերում կարող են պետք գալ այլ փաստաթղթեր ևս։

2. Վաճառել ինքնուրույն, թե գործակալի միջոցով

Հաջորդ քայլում պետք է որոշեք ցանկանում եք վաճառել ինքնուրույն, թե գործակալության միջոցով: Երկու տարբերակներն էլ ունեն առավելություններ և թերություններ: Ստորև ներկայացնում ենք որոշ նրբություններ, որոնք կօգնեն Ձեզ որոշում կայացնել:

Գործակալության միջոցով վաճառելու դեպքում շատ կարևոր է ընտրել փորձառու և բարեխիղճ մասնագետ: Այդ ընտրությունից են կախված հետագա բոլոր քայլերը: Ոչ պրոֆեսիոնալ կամ անբարեխիղճ գործակալի դեպքում կարող է ամբողջ ընթացքը դառնալ մի մեծ գլխացավանք: Ճիշտ գործակալի ընտրության դեպքում, Դուք հստակ կպատկերացնեք բոլոր սպասվող քայլերը, նա կպատասխանի Ձեզ հուզող ցանկացած հարցի, կազատվեք վազվզոցներից, պոտենցիալ գնորդների հետ շփումներից, կլինեք իրավաբանորեն պաշտպանված, կազմվող փաստթղթերը կլինեն իրավաբանորեն ճշգրիտ և օրենքի պահանջներին համապատասխան: Նա սկզբից մինչև վերջ կտանի ամբողջ պրոցեսը, իսկ Դուք կշահեք հսկայական ժամանակ և կխնայեք նյարդերը:

Ինչպե՞ս ընտրել գործակալ

Եթե ունեք մտերիմ, ով վերջին ժամանակներում վաճառել է բնակարան գործակալության միջոցով, արժե հանդիպել և հարցուփորձ անել: Եթե նա վստահորեն խորհուրդ կտա տվյալ գործակալին, ուրեմն կարող եք կապվել նրա հետ: Եթե չունեք ծանոթ, ապա ուշադրություն դարձրեք գործակալության հեղինակությանը, դրական արձագանքների առկայութանը, թե որքան ժամանակ է ընկերությունը կամ մասնավոր գործակալը աշխատում տվյալ ոլորտում:

Գործակալի հետ առաջին շփման ընթացքում Դուք պետք է հստակ պատասխաններ ստանաք համագործակցության պայմանների մասին` գին, միջնորդավճար, բացառիկ պայմանագրի անհրաժեշտություն և այլն: Ուշադրություն դարձրեք գրագետ խոսքին, ​​ժարգոնի բացակայությանը: Կարևոր է, որ նրա հետ շփումը լինի հեշտ, անկեղծ և առանց լարվածության: Այսպիսի վստահելի մթնոլորտը կհեշտացնի հետագա շփումները նրա հետ:

Ինչպես վաճառել առանց միջնորդ

Եթե վստահ եք Ձեր ունակություններին, և ունեք բավարար ժամանակ, կարող եք Ինքներդ փորձել վաճառել բնակարանը: Տվյալ դեպքում Դուք կվերահսկեք վաճառքի յուրաքանչյուր փուլ, ինքնուրույն կբանակցեք գնորդի հետ, միջնորդավճար չեք վճարի գործակալությանը: Բայց պետք է պատրաստ լինեք բավականին ժամանակ տրամադրել պոտենցիալ գնորդների հետ շփմանը, բնակարանը ցուցադրելուն և այլն: Նաև պետք է իրավական առումով լավ տեղեկացված լինեք առք և վաճառքին վերաբերվող բոլոր փուլերին:


3. Գնի որոշում

Բնակարանի գինը որոշելու համար կարող եք դիտել նմանատիպ բնակարանների գները: Նմանատիպ բնակարաները պետք է ընտրեք այնպես, որ գտնվեն նույն տարածաշրջանում, ունենան նմանատիպ մակերես, համընկնող կամ մոտ հարկ, նմանատիպ վերանորոգմամբ և այլն:

Այնուամենայնիվ, այս տարբերակը կօգնի միայն մոտավոր գնահատական տալ, որը հաշվի չի առնում Ձեր բնակարանի բոլոր առանձնահատկությունները: Եվ հաճախ այլ վաճառողների կողմից դրված գները կարող են լինել միայն ցանկալի գները, որոնք հեռու են այդպիսի բնակարանների իրական շուկայական արժեքից: Հետեւաբար, արժե կապվել պրոֆեսիոնալ գնահատողի հետ, ով կհաշվարկի իրական շուկայական գինը:


4. Բնակարանի նախապատրաստում

Այնուհետև, Դուք պետք է պատրաստեք բնակարանը՝ կատարելով կամ մաքրում, կամ նույնիսկ աննշան վերանորոգում: Սա կբարելավի տան տեսքը: Արժե ազատվել նաև ավելորդ աղբից, որը կարող է բացասաբար ազդել պոտենցիալ գնորդի ընկալման վրա և շեղել վաճառվող բնակարանի հիմնական բնութագրերից: Ցանկալի է բնակարանից բացի մաքրել և ավելորդ իրերից ազատել բնակարանի շքամուտքը:

Ինչ վերաբերում է վերանորոգմանը, չարժե կատարել գլոբալ վերանորոգում, բավական է շտկել միայն ամենակարևոր թերությունները: Կահույքը և մեծ կենցաղային տեխնիկան կարող եք հանել կամ թողնել նոր սեփականատիրոջը՝ որպես լրացուցիչ հաճելի բոնուս:


5. Բարձրորակ լուսանկարների ստեղծում

Գնորդին հետաքրքրելու համար հարկավոր է ցուցադրել նրան վաճառվող բնակարանի բարձրորակ լուսանկարներ: Եթե ունեք գումար, կարող եք վարձել պրոֆեսիոնալ անշարժ գույքի լուսանկարիչ, ով կկատարի այդ աշխատանքը Ձեզ համար: Սակայն ինքնուրույն ևս կարելի է ստանալ բարձրորակ նկարներ, անգամ հեռախոսի ֆոտոխցիկով: Ընտրեք օրվա լուսավոր ժամ, բացեք վարագույրները, որպեսզի հնարավորինս շատ լույս լինի տան մեջ: Եթե ինչ-ինչ պատճառով լուսանկարահանումը կատարում եք երեկոյան, ապա վառեք բոլոր առկա լույսերը նկարելուց առաջ:

Կանգ մի առեք բնակարանի մի քանի լուսանկարների վրա: Ցանկալի է հնարավորինս շատ և տարբեր լուսանկարել ոչ միայն բուն բնակարանը, այլ նույնիսկ բնակելի շենքը և հարակից տարածքը:

Բնակարանի լուսանկարները, պետք է անել տարբեր անկյուններից: Նախապատվությունը պետք է տրվի այն անկյուններին, որտեղից զգացվում է բնակարանի ընդարձակ և լուսավոր լինելը: Լուսանկարներում չպետք է լինեն Ձեր անձնական իրերը, այնպես որ ավելի լավ է դրանք հեռացնել նախքան նկարելը: Արժե նաև լուսանկարել բնակարանի պատուհանից բացվող տեսարանը: Եթե ունեք տան հատակագիծը, դա նույնպես լուսանկարեք:


6. Հայտարարության տեղադրում

Եթե աշխատում եք գործակալի հետ, նա ինքնուրույն կկազմի բնակարանի վաճառքի հայտարարության տեքստը և կտեղադրի օնլայն հարթակներում:

Եթե վաճառում եք ինքնուրույն, ապա պետք է կազմեք այնպիսի հայտարարություն, որը կհետաքրքրի հնարավորինս մեծ թվով մարդկանց: Կարևոր է թվարկել բոլոր հիմնական պարամետրերը: Մուտքագրեք հնարավորինս մանրամասն և ճշգրիտ տվյալներ: Պետք չէ ավելորդ ճոխացնել, զարդարել իրականությունը, միևնույն ժամանակ պետք չէ խուսափել գովազդային տեքստերից: Կարող եք օգտագործել կրեատիվ մոտեցումներ, որպեսզի Ձեր հայտարարությունը տպավորվի մնացած հայտարարությունների ֆոնին: Վստահորեն կարող եք նկարագրել այն առավելությունները, որոնք Դուք անձամբ զգացել եք այդտեղ ապրելով: Լուսանկարները բեռնելուց ուշադիր եղեք, որպեսզի չլինեն շրջված կամ գլխիվայր նկարներ:


7. Բնակարանի նախապատրաստում ցուցադրության համար

Լավագույն տարբերակը կլինի այն, որ բնակարանում ոչ ոք չբնակվի այդ ընթացքում: Եվ որ գործարքի կնքումից հետո, գնորդը անմիջապես կարողանա տեղափոխվել նոր բնակարան: Նման բնակարանները միշտ մի փոքր ավելի շատ ուշադրություն են գրավում: Բացի այդ, այս դեպքում բնակարանը ցուցադրման պատրաստելը բավականին հեշտ է, կարիք չկա ամեն այցելուից առաջ մաքրել, հավաքել ավելորդ իրերը և այլն: Ցուցադրության հիմնական նպատակն է, որ հաճախորդը սիրահարվի բնակարանին, և վախենա, որ մեկ ուրիշը կարող է գնել այն, եթե նա հապաղի: Ուստի պետք է գեղեցկություն և հարմարավետություն ստեղծել ցուցադրությունից առաջ: Գնորդը ցուցադրության ժամանակ չպետք է կաշկանդված լինի բնակիչների անձնական իրերով, կամ հենց բնակիչների ներկայությունից: Նա պետք է ազատ կարողանա մտնել ցանկացած հատված, բացել ցանկացած դուռ և զգա ազատ: Ցուցադրության ժամանակ չպետք է ի հայտ գան հայտարարության տեքստին հակասող իրողություններ: Նույնիսկ աննշան հակասությունների դեպքում, գնորդի մոտ կսերմանվի կասկած և նա ուղղակի չի ցանկանա շարունակել:


8. Վաճառք

Գնորդի և վաճառողի համաձայնության գալուց հետո սկսում է առք և վաճառքի ընթացքը։ Վաճառքի փուլը որպես առանձին հոդված տեղադրված է մեր կայքում հետևյալ հղումով՝ Վաճառքի գործընթաց: